في حب مصر

>> فؤاد حداد >> في حب مصر ..


في حب مصر ..


رقم القصيدة : 83279 نوع القصيدة : عامي ملف صوتي: لا يوجد




مفيش في الأغاني كده ومش كده

تفرقنا عن بعض بالشكل ده

يا مصر اللي جايبة الشجر من زمان

وشايلة الضفاير على البرتقان

وقبل الأوان اللي قبل الأوان

بتحييني أنفاسك المسعده

مفيش في الأغاني كده ومش كده

تفرقنا عن بعض بالشكل ده

يا حلوة كلامك تحبه الودان

يشمسني في الدروه زي الميدان

يمشيني بين الحيطان الغيطان

عروسه وحصان في القمر والعدا

مفيش في الأغاني كده ومش كده

تفرقنا عن بعض بالشكل ده

عنيكي تغمض وتفتح يبان

سطوح الليالي عليه الأمان

وبحر الدره من ورق لامتحان

وبتغني موّالي يا مولّده

مفيش في الأغاني كده ومش كده

تفرقنا عن بعض بالشكل ده

بحبك كأني طليق العنان

و زى العجوز اللي دق البيبان

وزي الكتاب اللي كان ياما كان

وزي الرصيف اللي في السيده

مفيش في الأغاني كده ومش كده

تفرقنا عن بعض بالشكل ده

[i]d]]الله على الجمال

الله على التعبير

ربنا يجمع شعب مصر على الخير[/b][/i]